ОРАЛ. KAZINFORM — Батыс Қазақстан облысы Ақжайық ауданының прокуратурасы талдау жүргізу нәтижесінде аудан әкімдігінің алыс елді мекендерде тұратын балаларды мектепке тасымалдау тәртібін айқындамағанын анықтады.
БҚО прокуратурасының баспасөз қызметінен мәлім еткеніндей, «Автомобиль көлігі туралы» ҚР Заңына сәйкес аудандардың әкімдіктері шалғайдағы елдi мекендерде тұратын балаларды жалпы бiлiм беретiн мектептерге тасымалдаудың схемасы мен тәртiбiн әзірлейді және бекiтедi.
— Талдау барысында Есенсай — Жазира — Тасоба, Ақсуат — Ақбұлақ, Ақсуат — Сахарный, Талап — Әтібек, Базаршолан — Баянтөбе және басқа бағыттарда барлығы 90-ға жуық оқушының тасымалы реттелмегені белгілі болды. Прокуратураның аудан әкіміне енгізген ұсынымы негізінде тиісті қаулы қабылданды. Осылайша, мектебі жоқ елді мекендерден 88 баланың қауіпсіз тасымалына қатысты мәселе шешілді, — деп хабарлады ведомстводан.
Еске сала кетейік, бұдан бұрын Батыс Қазақстанда балабақшада 26 млн теңге міндетті төлемнің төленбей қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).