ОРАЛ. 2 қаңтар. ҚазАқпарат - Батыс Қазақстан облысында жылдағы дәстүр бойынша қаңтар, ақпан айларында барлық деңгейдегі әкімдер тұрғындар алдында есеп береді.
Орал қаласы әкімдігінен түскен мәліметке қарағанда, шаһар басшысы Алтай Көлгіновтің және қалаға қарасты ауылдық округ пен кент әкімдері есептік кездесулерінің кестесі бекітілді. Алғашқы жүздесу Круглоозерный кентінде 14 қаңтарда өткізілмекші. Одан кейін Зачаган, Желаев ауылдық округінде 15, 16 қаңтарда, 12 ақпанда Орал қаласында жалғаспақшы. Осыған байланысты қаланың сегіз жерінде тұрғындар ұсыныс-тілектерін, сауалдарын алдын ала жолдау үшін жәшіктер орнатылмақшы.
Сырым ауданы әкімдігінен хабарлағанындай, мұнда 13 қаңтардан бастап 12 ауылдық округ әкімі өз есептерін бермек. Сондай-ақ Сырым аудандық «Сырым елі» газетінде аудан әкімі Абат Шыныбеков баяндамасының желілері жарияланды. Ауылдық округтерде арнайы жәшіктер орнатылады.
Өңірде қала, аудан, ауылда әкімдер өткен жылды қорытындылап, тұрғындардың ұсыныс-пікірлерін ескере отырып, алдағы іс-жоспарларын белгілейді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).