ОРАЛ. ҚазАқпарат – Батыс Қазақстан облысында коронавирус жұқтырған соңғы 10 науқастың бесеуі – Түркістан облысының тұрғындары, деп хабарлайды ҚазАқпарат тілшісі.
БҚО әкімдігінен түскен мәліметке қарағанда, сондай-ақ тағы төрт науқас – облыс тұрғындары. Олардың барлығы да Ресейден келген.
Саратов облысымен шектесетін «Тасқала» автоөткелінен өткеннен кейін денсаулықтарына шағымы болмағанмен, жедел жәрдеммен карантиндік стационарға жеткізілген.
Сонымен бірге коронавирус табылғандардың бірі – 29 жастағы медицина қызметкері. Ол бұрын коронавирус жұқтырған адаммен қарым-қатынаста болған.
Науқастардың барлығы облыстық жұқпалы аурулар ауруханасына жатқызылды. Олармен байланыста болғандар медициналық бақылауға алынды.
Ауру ошақтарында дезинфекциялық жұмыс жүргізілді. Індетке қарсы күрес жалғасуда.
Осылайша БҚО-да ауырғандар саны 163-ке жетіп, соның 10-ы емделіп шықты. Коронавирус жұқтырғандардың басым көпшілігі – Ресейден келгендер, 29-ы – медицина қызметкері.
Еске сала кетейік, бұдан бұрын БҚО-да коронавирус анықталған соңғы науқастың Ресейден оралған шымкенттік тұрғын екенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).