ОРАЛ. ҚазАқпарат - Бөкей ордасы ауданы орталығы Сайқын ауылында 6 қаңтар күні қайғылы оқиға орын алды, деп хабарлайды «ҚазАқпарат» ХАА тілшісі.
Аудандық ішкі істер бөлімінен алынған алдын ала мәліметке қарағанда, 1989 жылғы Бекет Қожантаев алдымен жеңгесі Қарашашқа пышақ жұмсаған. Сол кезде арашаламақ болған өзінен бір жас үлкен ағасы Медетке төрт рет пышақ сұққан. Марқұм аудандық ауруханаға жеткенше жан тапсырған. Төрт айлық сәбиі бар жеңгесі қазір аудандық ауруханада емделуде.
Қазіргі кезде осы дерекке байланысты қылмыстық іс қозғалып, сот-медициналық сараптамалар тағайындалып, тергеу амалдары жүргізілуде.
Ауыл тұрғындарының айтуынша, арасы бір жас болғанымен, Медет пен Бекет мектепті бір жылда бітірген. Інісі жоғары білімді болғанымен, үш-төрт айдай үйінде жұмыссыз отырған. Бұрын олардың ашу-араздықтары байқалмаған.
Бір шаңырақты ортасына түсірген қайғылы оқиғадан кейін бүгін Медет жер қойнына тапсырылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).