ОРАЛ. ҚазАқпарат - Батыс Қазақстан облысында «Жасырын көші-қон - 2018» шарасы кезінде төрт күнде 445 шетелдік жауапқа тартылды, деп хабарлайды ҚазАқпарат тілшісі.
БҚО ішкі істер департаментінің баспасөз қызметінен түскен мәліметке қарағанда, олар 17-20 қыркүйек аралығында елде болу ережесін бұзғаны үшін ҚР Әкімшілік құқықбұзушылық кодексінің 517-бабына сәйкес жауапкершіліктен құтыла алмады.
Сонымен қатар шекара аумағындағы және жекелеген жерлердегі тәртіпті бұзған 26 шетелдік 510-бапқа сәйкес жазаға ілікті. Қазақстанға шақырылған шетелдіктердің ереже бұзғаны үшін (518-бап) 111 қазақстандық азамат жауапқа тартылды. Шетелдік жұмыс күшін пайдалану ережесін бұзғаны және шетелдік азаматтың заңсыз еңбек еткені үшін (519-бап) 24 жұмыс беруші жазаланды.
Облыстық ішкі істер департаментінің қабылдау-тарату орнына құжатсыз жүрген 7 шетелдік жеткізілді. Сот шешімімен 49 адам елден шығарылды. Оған қоса елден шығарылғаны жөнінде сот шешімін орындамаудың 7, мемлекеттік шекараны заңсыз кесудің 2 дерегі анықталды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).