ОРАЛ. ҚазАқпарат - Биылғы 2 маусым күні Орал-Ақсай жолы бойында қос бірдей «Фольксваген Шаран» автокөлігі бетпе-бет соқтығысып, соның салдарынан төрт адам қаза тауып, 10-ы түрлі жарақат алған еді. Осы оқиғаға қатысты қозғалған қылмыстық іс бас күдіктінің өліміне байланысты тоқтатылды, деп хабарлайды «ҚазАқпарат» тілшісі.
БҚО ІІД анықтау басқармасы бастығының міндетін атқарушы Максим Сыйқовтың мәлім еткеніндей, медициналық сараптама қорытындысына сәйкес екі жүргізуші де ішімдік ішпеген. Сонымен қатар автокөліктердің техникалық жай-күйі де тексерілді. Жол апатына техниканың сынуы емес, Оралдан Ақсайға кетіп бара жатқан А.Мұқаш деген жүргізушінің автокөлігімен қарсы бетке шығып кетуі себепкер болған. Оған қоса сол жердің ойығы да болмаған. Жүргізуші не қалғып кеткен, не басқа бір нәрсеге алаңдаған сыңайлы. Соның салдарынан өзімен бірге үш бірдей жолаушы көз жұмды. «Экипаж Батыс» ЖШС директорының міндетін атқарушы Т.Құрманғалиевтің және басқа жолаушы тасымалдайтын кәсіпорындардың берген дерегіне қарағанда, А.Мұқаш олардың ешқайсысында жұмыс жасамаған. Ал екінші жүргізуші Т.Мусин «Экипаж Батыс» ЖШС-мен келісімшартқа отырған.
Осылайша, тергеу қорытындысына сәйкес бас күдіктінің өліміне байланысты қылмыстық іс тоқтатылды. Қабылданған шешім жөнінде жәбірленушілерге хабар берілді. Олардың моральдық және материалдық залалды өндіру жөнінде сотқа талап-арыз беруге құқықтары бар.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).