ОРАЛ. KAZINFORM – Батыс Қазақстан облысы Казталов ауданында Қараөзен мектеп-лицейінің интернаты отқа оранды.
БҚО ТЖ департаментінің баспасөз қызметінен мәлім еткеніндей, Қараөзен ауылында ауданы 388 шаршы метр бір қабатты интернат ғимаратының өртеніп жатқаны жөнінде хабар 9 шілде күні сағат 14.30-да түскен.
- Өрт сөндірушілер тез арада жетіп, «тілсіз жауды» толықтай ауыздықтады. Өртті сөндіруге 13 адам, 2 техника тартылды. Мектеп-лицей интернаты күрделі жөндеуде болған. Зардап шеккендер жоқ. Қазір оқиғаның себебі анықталу үстінде, - деп хабарлады ведомстводан.
Тұрғындардың сөзіне қарағанда, интернат ғимаратын «Жайық Сити» ЖШС күрделі жөндеуден өткізіп жатқан.
Еске сала кетейік, бұдан бұрын Оралда құны 65 млн теңгеден асатын сиреналық-сөйлеу құрылғалы орнатылып жатқанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).