АСТАНА. KAZINFORM — Башқұртстан астанасы Уфа қаласында бокстан әйелдер арасында Ресей чемпионаты мәресіне жетті.
Омбылық қазақ қызы Салтанат Меденова 81 келіге дейінгі салмақта финалда Краснодар өлкесінің өкілі, 2023 жылғы әлем чемпионы Анастасия Демурчянды ұтып, чемпион атанды.
Біріншілікте барлығы 12 салмақ дәрежесі бойынша үздіктер анықталды. Турнирдің жүлде қоры — 24 млн рубль. Жеңімпаздар 1,5 млн рубльден алады.
24 жастағы Салтанат Меденова осымен төртінші рет Ресей чемпионы атанып отыр. Өткен жылы Серпухов қаласында (Мәскеу облысы) финалда сол А.Демурчяннан айласын асырған болатын.
Салтанаттың ең үлкен табысы биылғы жылдың үлесінде. Ол 8-17 наурызда Сербияда өткен әлем чемпионатында соңғы бәсекеде түркиялық Бюшра Ишилдарды жеңіп, жеңімпаз атанған еді.
Еске сала кетейік, бұдан бұрын қазақ қызы бокстан үш мәрте Ресей чемпионы атанғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).