АСТАНА. ҚазАқпарат – Үндістанның Нью-Дели қаласында бокстан әйелдер арасында өтіп жатқан әлем чемпионатында қазақстандық Карина Ибрагимова бүгін финалдық жекпе-жегін өткізеді, деп хабарлайды ҚазАқпарат тілшісі.
Қазақстандық боксшы 57 келіге дейінгі салмақта италиялық Ирма Тестамен қолғап түйістіреді.
Қос спортшы Астана уақытымен сағат 18.30-да басталатын кешкі сессияда үшінші жекпе-жекте рингке шығады.
Әлем чемпионаты «Qazsport» телеарнасынан тікелей эфирде көрсетіледі.
Осыған дейін Азия чемпионы атанып, екі мәрте әлем біріншілігінің қола жүлдегері болған К.Ибрагимова енді кемінде күміс медаль алады.
Ирма Теста да осал қарсылас емес. Ол – 2020 жылғы Токио олимпиадасының қола, өткен жылғы әлем біріншілігінің күміс жүлдегері, 2019 жылғы Еуропа чемпионы.
Тағы бір қазақстандық Ләззат Күнгейбаева аса ауыр салмақта ертең алтын үшін таласады. Ал Алуа Балқыбекова, Надежда Рябец, Валентина Хальзова және Фариза Шолтай қола жүлдегер атанды.
Еске сала кетейік, бұдан бұрын Карина Ибрагимованың екі дүркін әлем чемпионын ұтып, финалға шыққанын жазған болатынбыз.
Сондай-ақ бокстан әлем чемпионатында қазақстандықтардың алтын үшін кімдер таласатыны хабарланды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).