Елде сайлау учаскелері жергілікті уақыт бойынша сағат 08:00-де ашылды. Дауыс беру сағат 17:00-ге дейін жалғасады.
Президенттікке Еңбекшілер партиясының атынан қатысып отырған қазіргі мемлекет басшысы Луис Инасиу Лула да Силва және бұрынғы президент Жаир Болсонарудың ұлы, Либералдық партияның кандидаты Флавиу Болсонару үміткер.
Екі кандидат та 4 қазанда өткен бірінші турдың қорытындысы бойынша екінші кезеңге өтті. Сол кезде Флавиу Болсонару жарамды дауыстардың шамамен 47 пайызын жинап, Лула да Силвадан екі пайыздық тармаққа жуық басым түсті.
Жуырда жүргізілген қоғамдық пікір сауалнамалары кандидаттар арасындағы бәсекенің әлі де шиеленісті екенін көрсетеді.
Бразилияның сайлау заңнамасына сәйкес, бірінші турда жарамды дауыстардың жартысынан көбін жинаған кандидат жеңімпаз атанады. Егер үміткерлердің ешқайсысы бұл межеден аса алмаса, ең көп дауыс жинаған екі кандидат екінші турға қатысады.
Бұған дейін Бразилияда өткен президент сайлауының бірінші туры жеңімпазды анықтай алмағаны хабарланған еді. Оның нәтижесі сайлауалды сауалнамалар аясында күтпеген жағдай болды. Зерттеулердің басым бөлігі Лула да Силваның аздаған басымдығын көрсеткенімен, кандидаттар арасындағы айырмашылық статистикалық қателік шегінде болған. Жалпы, сайлауға 12 кандидат қатысқан.
Айта кетейік, Жаир Болсонару 2022 жылғы сайлаудан кейін Луис Инасиу Лула да Силваның президент қызметіне кірісуіне кедергі жасау мақсатында сөз байласқаны үшін кінәлі деп танылып, 27 жылға сотталған. Сол кезде прокурорлар жоспардың жүзеге аспауына жоғары әскери басшылықтың қолдауы болмағаны ғана себеп болғанын мәлімдеген.
Бразилия, Канада және АҚШ-тағы сайлау учаскелері өз жұмысын бастады.