АСТАНА. KAZINFORM — Футболдан бірінші лига командалары арасында Қазақстан чемпионатының 12-турында «Тұран» (Түркістан) өз алаңында Оралдың «Жайығын» қабылдады.
Түркістандықтар көш бастаушылардың бірі болса, оралдықтар ортаңғы тұста еді.
Батысқазақстандықтар ойынды сәтті бастап, 7-минутта Әлімжан Журасов есеп ашты. Бірінші тайм соңында қосымша 4-минутта Әлихан Исраилов есепті 2:0-ге жеткізді.
Екінші таймда төреші қонақтардың қақпасына екі рет 11 метрлік айып добын белгіледі. Оны Мирас Тұрлыбек дәл орындады. Қорытынды есеп — 2:2.
Түркістандықтар 12 турдан кейін 25 ұпаймен үздік үштікті түйіндеп тұр. «Қайрат жастары» 32 ұпаймен көш бастаса, Қарағандының «Шахтері» (31 ұпай) екінші сатыда, ал «Жайық» (16-ұпай) 9-орында келеді.
Оралдықтар 9 шілде күні өз алаңында «Тобыл жастарын» қабылдайды.
Еске сала кетейік, бұдан бұрын бірінші лигада «Жайық» клубының қатарынан үшінші жеңісіне қол жеткізгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).