Бүгін футболдан Еуропа және Конференция лигаларының ширек финалы басталады

АСТАНА. KAZINFORM - Бүгін футболдан Еуропа және Конференция лигалары 1/4 финалының алғашқы ойындары өткізіледі.

Жанкүйерлер Еуропа лигасындағы «Ливерпуль» (Англия) мен «Аталанта» (Италия) кездесуін асыға күтеді.

Ойын елорда уақытымен 23:50-де басталып, «Qazsport» телеарнасынан тікелей эфирд көрсетіледі.

Сондай-ақ, аталған турнирде «Бенфика» (Португалия) мен «Марсель» (Франция), «Милан» (Италия) мен «Рома» (Италия), «Байер» (Германия) мен «Вест Хэм Юнайтед» (Англия) кездеседі.

Ал Конференция лигасында «Виктория Пльзень» (Чехия) мен «Фиорентина» (Италия), «Олимпиакос Пирей» (Грекия) мен «Фенербахче» (Түркия), «Астон Вилла» (Англия) мен «Лилль» (Франция), «Брюгге» (Бельгия) мен ПАОК (Грекия) шеберлік байқасады.

Қарымта ойындар 18 сәуірге белгіленген.

Еске салсақ, футболдан Чемпиондар лигасы ширек финалының ойындары өткізілді.

Алғашқы ойын күнінде «Реал Мадрид» (Испания) пен «Манчестер Сити» (Англия) 3:3, «Арсенал» (Англия) мен «Бавария» (Германия) 2:2 есебімен тең түсті.

Ал екінші ойын күнінде «Барселона» (Испания) «Пари сен-Жермен» (Франция) командасынан 3:2, «Атлетико Мадрид» (Испания) «Боруссия Дортмунд» (Германия) клубын 2:1 есебімен жеңді.