АСТАНА. KAZINFORM — Бүгін Ақтөбе қаласында волейболдан ерлердің ұлттық лига командалары арасында Қазақстан чемпионаты плей-офф кезеңінің алғашқы ойындары өтеді.
Өткен жылы Оралда финалда Виктор Козик жаттықтыратын «Жайық» клубы «Ақтөбені» (бас бапкері Сергей Трикоз) қапы қалдырып, чемпион атанған еді.
Биыл қос команда жартылай финалда кездеседі. Екі жеңіске қол жеткізген біреуі финалға жолдама алады.
Екінші жартылай финалда тұрақты чемпионатта көштің алдын бермеген, Марат Адрышев баптайтын «Жетісу» клубы «Атыраумен» (бас жаттықтырушы Игорь Никольченко) ойнайды.
Көкшетау қаласында қалған төрт клуб – «Буревестник» (Алматы), «Тараз», «Есіл» және «Ұшқын-Көкшетау» 5-8 орындар үшін алаңға шығады.
Еске сала кетейік, бұдан бұрын әйелдер арасында «Жетісу» волейбол клубының оныншы рет Қазақстан чемпионы атанғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).