Бұрынғы Әділет министрі Марат Бекетаевты қамауда ұстау мерзімі тағы ұзартылды

АСТАНА. KAZINFORM – ҚР бұрынғы Әділет министрі Марат Бекетаевты қамауда ұстауды тағы бір айға ұзарту туралы сот санкциясы қабылданды. Бұл туралы Астана қалалық сотының Kazinform ақпарат агенттігі жолдаған ресми сауалына берген жауабында айтылған.

«2024 жылғы 12 ақпанда Астана қаласының мамандандырылған ауданаралық тергеу сотымен күдікті Марат Бекетаевқа қатысты күзетпен ұстау түріндегі бұлтартпау шарасын 2024 жылғы 21 наурызға дейін ұзарту санкцияланды», - делінген сауал жауабында.

Сондай-ақ, қалалық соттан ҚР Қылмыстық іс жүргізу кодексінің 201-бабына сәйкес өзге деректердің жария етілмейтіні айтылды.

Өткен жылы 29 желтоқсанда М. Бекетаевты қамауда ұстау мерзімі 2024 жылғы 21 қаңтарға дейін ұзартылған еді.

Одан кейін, елорда соты экс-шенеунікті 2024 жылғы 21 ақпанға дейін қамауда ұстау туралы шешім қабылдады.

Еске сала кетейік, бұрынғы Әділет министрі лауазымдық өкілеттігін асыра пайдаланды деген күдікпен ұсталды.