Дәрігерлер Рим Папасына адам көп жиналатын жерге бармауды ұсынды

АСТАНА. KAZINFORM -  Жексенбі күні түстен кейін Франциск 38 күн болған Агостино Джемелли ауруханасынан шығарылды, деп хабарлайды euronews.com.

Понтифик ғимараттың оныншы қабатындағы балконда мүгедектер арбасында отырып, ғимарат алдына жиналғандарға батасын берді. Бұл оның бес аптадан кейін алғаш көпшілік алдына шығуы еді.

Беті ісіп тұрған ол көпшілікке бірер сөз ғана айтты: «Мен сары гүл ұстаған әйелді көріп тұрмын. Браво!».

Балконда ол өздігінен демалды, бірақ Ватиканға барар жолда көлікте оттегі түтігін пайдаланған. Оны діндарлар көшеде қарсы алды.

Ауруханадан шыққан Рим Папасы емін жалғастыру үшін резиденциясына барды. Дәрігерлер оған екі ай демалу керегін айтқан. Оның қоғамдық қызметі шектеледі. Дәрігерлердің пікірінше, понтифик адам көп жиналатын жерлерге бармауы керек.

88 жастағы Рим Папасы Франциск 14 ақпанда бронхитпен ауруханаға түскен. Осыдан кейін оның жағдайы нашарлады: оған екі жақты пневмония диагнозы қойылды. Католик шіркеуінің басшысы антибиотиктермен емделіп, наурыз айының басында жасанды тыныс алу аппаратына жатқызылды.

Жас кезінде понтификтің өкпесінің бір бөлігін алып тастаған және өмір бойы тыныс алу проблемасынан зардап шегіп келеді.

Дәрігерлер Рим папасының денсаулығына қатысты деректі жариялаған болатын.

Ватикан Рим папасының ауруханаға түскеннен кейінгі алғашқы фотосуретін жариялады.