АСТАНА. KAZINFORM – Қазақстандық, әлемнің 218-ракеткасы Денис Евсеев Хельсинки (Финляндия) челленджер турнирінің финалына шыға алмады.
Қазақстандық теннисші жартылай финалында әлемнің 102-інші, осы жарыстың 5-ракеткасы, италиялық Люка Нардимен ойнады.
Бірінші партияда Евсеев басымдылық танытты – 6:2. Екіншісінде Нарди есе қайырды – 6:3.
Үшінші, шешуші сетте есеп 5:4 болған мезетте қазақстандық спортшы матчқа доп бергенімен, сол мүмкіндігін пайдалана алмады. Ақыры тай-брейкте италиялық теннисшінің жолы болды – 7:6 (7:4).
Екі сағат 12 минутқа созылған тартысты бәсеке барысында Евсеев 4 эйспен бірге 13 брейк-пойнттың бесеуін ғана өз есебіне жазды. Нарди 4 эйс, 5 брейкпен (6 брейк-пойнт) көзге түсті.
Л.Нарди финалда әлемнің 132-ракеткасы, жапониялық Кэй Нисикоримен бас жүлдені сарапқа салады.
Еске сала кетейік, бұдан бұрын Денис Евсеевтің Финляндиядағы жарыстың жартылай финалына жолдама алғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).