Әлемнің 417-ракеткасы Дмитрий Попко Буэнос-Айрес (Аргентина) челленджер жарысының ширек финалына жолдама алды, деп хабарлайды Kazinform.
Қазақстандық теннисші екінші айналымда әлемнің 327-ракеткасы, германиялық Тимо Штоддердің меселін қайырды.
Бірінші партияда тай-брейкте Попко сәттірек ойнады — 7:6 (9:7).
Екінші сетте ол алдымен 3:1 есебімен алға кетті. Штоддер таразы басын теңестіргенімен, қайтадан басымдыққа ие болды — 5:3.
Ақыры матчқа доп бергенде, есесін жібермеді — 6:4.
Екі сағаттан сәл астам уақытқа созылған бәсеке барысында Д. Попко 4 эйспен бірге 4 брейкке (7 брейк-пойнт) қол жеткізді.
Т.Штоддер 6 брейк-пойнттың тең жартысын өз есебіне жазды.
Дмитрий Попко жартылай финалға шығу үшін әлемнің 268-ракеткасы, америкалық Тристан Бойермен таласады.
Еске сала кетейік, бұдан бұрын Елена Рыбакинаның тағы бір ірі жарысты сәтті бастағанын жазған болатынбыз.
Сондай-ақ Юлия Путинцева Хобарт турнирінің ширек финалына шықты.
Анна Данилина Хобарт жарысының жартылай финалына өтті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).