Дмитрий Попко Түркиядағы турнирдің чемпионы атанды

АСТАНА. KAZINFORM — Қазақстандық теннисші, әлемнің 493-ракеткасы Дмитрий Попко Анталия (Түркия) ITF M15 турнирінде үздік шықты.

Фото: Қазақстан теннис федерациясы

Жарыстың 3-ракеткасы блып тіркелген қазақстандық теннисші алдымен аустриялық Маттиас Уйвариды 6:1, 3:6, 6:1 есебімен жолдан тайдырды.

Содан кейін екінші айналымда франциялық Антони Фабрдан басым түсті – 6:0, 6:3.

Ширек финалда чехиялық Матиаш Черныды қапы қалдырды – 6:3, 6:2.

Жартылай финалда ирандық Али Язданиды 7:6 (7:4), 6:0 есебімен тізе бүктірді.

Д.Попко финалда әлемнің 374-інші, турнирдің 1-ракеткасы, ресейлік Андрей Чепелевтен айласын асырды – 6:2, 7:5.

Дмитрий Попко осы табысы нәтижесінде қазіргі кезде ATP Live рейтингісінде 483-орынға көтеріліп тұр.

Еске сала кетейік, бұдан бұрын Жібек Құламбаеваның Чилидегі жарыста топ жарғанын жазған едік.

Сондай-ақ қазақстандық теннисші Мысырдағы турнирде екінші рет жеңімпаз атанды.