ОРАЛ. KAZINFORM – Допты хоккейден жоғары лига командалары арасында бүкілресейлік жарыста өнер көрсететін «Ақжайық» өз айдынында «Маяк» (Краснотурьинск) командасын қабылдады.
Николай Шавалдин жаттықтыратын оралдықтар өз тобында екінші орында тұрса, краснотурьинскілік клуб үшінші сатыда еді.
Өткен жылы 16 желтоқсанда «Ақжайық» Краснотурьинскіде алғашқы ойында «Маякты» 4:3 есебімен ұтса, бір күннен кейін 4:10 есебімен жеңіліп қалған еді.
Содан бері қатарынан 12 матчта жеңіске жеткен батысқазақстандық клуб бүгінгі матчта да іркілмеді. «Маякты» 10:2 есебімен тізе бүктіріп, есе қайтарды.
«Ақжайықтан» команда сұрмергені Максим Пахомов 7 голдың авторы атанса, «Маяк» қақпасына Артем Лапшин, Максим Өтебалиев, Самат Аманшин бір-бірден доп енгізді. Сондай-ақ Рауан Исалиевтің 7 рет нәтижелі пас бергенін атап өткен жөн.
Ертең қос команда екінші кездесуін өткізеді.
Еске сала кетейік, бұдан бұрын допты хоккейден «Ақжайықтың» орынборлық команданы 17:0 есебімен ұтқанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).