ОРАЛ. KAZINFORM — Допты хоккейден жоғары лига командалары арасында бүкілресейлік жарыста өнер көрсететін Оралдың «Ақжайығы» Верхний Уфалей қаласында жергілікті «Никельщикпен» кездесті.
Екінші топта айдын иелері көш бастаса, оралдықтар үздік үштікті түйіндеп тұр.
«Никельщик» тартысты ойында 5:3 есебімен басым түсіп, жалпы ұпай санын 59-ға жеткізді.
«Ақжайықтан» Максим Пахомов екі голдың авторы атанса, тағы бір доп Артем Лапшиннің еншісінде.
28 ақпан күні қос команда өз тобындағы соңғы матчтарын өткізеді.
Қазіргі кезде «Ақжайықтың» қоржынында 54 ұпай бар.
«Біздің топтан төрт команда финалға жолдама алады. „Ақжайыққа“ кемінде үшінші орын бұйыратыны анық. Сондықтан 4-14 наурыз аралығында Иркутск қаласында өтетін финалдық сайыстарға қатысып, жоғары лиганың үздік командаларымен сынға түсетін боламыз», деді «Kazinform» тілшісіне «Ақжайықтың» бас бапкері Николай Шавалдин.
Еске сала кетейік, бұдан бұрын «Ақжайықтың» тартысты матчта қарсыласына жол бергенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).