НҰР-СҰЛТАН. ҚазАқпарат – Красноярск қаласында допты хоккейден жоғары лига командалары арасында өтіп жатқан бүкілресейлік жарыстың финалында Оралдың «Ақжайығы» төртінші кездесуін бүгін «Кировец» (Уфа) командасымен өткізді, деп хабарлайды ҚазАқпарат тілшісі.
Аталмыш қос клуб үшінші топта сынға түсіп, финалдық кезеңге жолдама алған болатын. Өзара ойындарында қос-қостан жеңіске жеткен еді.
Бұл жолы «Ақжайықтан» Петр Грибанов есеп ашқанымен, уфалықтар сапындағы Павел Даданов қатарынан үш гол соқты. Бұдан кейін Сергей Башаев есепті қысқартты – 2:3.
Екінші таймда уфалықтар сәттірек ойнап, қорытындысында 11:7 есебімен ұтып кетті. «Ақжайықтан» ресейлік сұрмерген Максим Пахомов үш, команда капитаны Максим Өтебалиев екі голдың авторы атанды.
Оралдықтар А тобындағы соңғы матчын 11 наурыз күні «Волга-Черемшан» (Ульяновск) командасымен өткізеді.
Еске сала кетейік, бұдан бұрын «Ақжайықтың» екінші жеңісіне қол жеткізгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).