ЕКІБАСТҰЗ. ҚазАқпарат – Қатты бораннан келген ақауды жөндеу жұмыстары аяқталып, Екібастұз-Ағадыр электр желісі қайта іске қосылды, деп хабарлайды ҚазАқпарат «KEGOC» АҚ коммуникациялар қызметіне сілтеме жасап.
«15 сәуірде сағат 20:39-да авариялық-қалпына келтіру жұмыстары аяқталып, 500 кВ Л-5170 Екібастұз-Ағадыр электр желісі қайта іске қосылды. Қазақстанның 500 кВ «Солтүстік-Оңтүстік» транзитінің қалыпты схемасы қалпына келтірілді. Авариялық-қалпына келтіру жұмыстары кезінде тұтынушыларды электр қуатымен қамту Қазақстан мен Орталық Азия біріктірілген энергожүйесінің резервтерін іске қосу арқылы толық көлемде атқарылды», - делінген ресми хабарламада.
Еске салсақ, 14 сәуір күні боранда электр тарату жүйелік желісіне зақым келіп, үш учаскеде үзілу анықталған. Жөндеу жұмыстарына «KEGOC» АҚ Солтүстік және Орталық филиалдарынан құрамында 36 маман мен 14 арнайы техникасы бар бригадалар жұмылдырылды.
Гүлнұр Ғазизқызы
Әл-Фараби атындағы ҚазҰУ журналистика факультетінің түлегі. Еңбек жолын «Қазақ әдебиеті», «Сақшы» газеттерінен бастаған. «Дала мен Қала» республикалық қоғамдық-саяси апталығында тілші, жауапты хатшы болып істеді. «Қазақстан-Ақтау» телеарнасының тілшісі, «Қазақстан» Ұлттық арнасының Маңғыстау облысындағы меншікті тілшісі, Маңғыстау облысы әкімі баспасөз қызметінің бас маманы, «Қазақстан» РТРК» АҚ Маңғыстау облыстық филиалы директорының орынбасары – бас редакторы болды.
Ақпарат саласының үздігі.
«ҚР Президенті телерадиокешенінде» 2022 жылғы 1 сәуірден бастап істейді. Kazinform халықаралық ақпарат агенттігі басқарушы директорының орынбасары – қазақ редакциясының бас редакторы.