АСТАНА. KAZINFORM – 16-22 маусым аралығында өтетін Берлин (Германия) WTA 500 турнирінің жеребесі тартылды. Қазақстанның көшбасшы теннисшісі Елена Рыбакинаға алғашқы айналымда әлемнің 5-ракеткасы, Париж Олимпиадасының чемпионы, қытайлық Чжэн Циньвэнь тап болды.
Қарсыластар осыған дейін үш рет кездесіп, соның екеуінде Е.Рыбакина жеңіске жеткен.
Лондон WTA 500 жарысында Е.Рыбакинаны ұтқан германиялық Татьяна Мария әлемнің 8-ракеткасы, америкалық Мэдисон Кизді 6:3, 7:6 (7:3) жолдан ығыстырып, финалға жолдама алды. Ал Чжэн Циньвэнь жартылай финалда америкалық Аманда Анисимоваға жол берді – 2:6, 6:4, 4:6.
Биыл Берлин додасының жүлде қоры 925 661 еуроға бағаланған. Жекелей сында жеңімпаз атанған теннисші 142 610 еуро табыс тауып, 500 рейтингілік ұпайға қол жеткізеді.
Өткен жылы финалда ресейлік Анна Калинскаяны қапы қалдырған америкалық Джессика Пегула үздік шыққан еді.
Еске сала кетейік, бұдан бұрын Анна Данилинаның Лондон турнирінде чемпиондық атақ үшін таласатынын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).