АСТАНА. KAZINFORM — Қазақстанның бірінші, әлемнің 1-ракеткасы Елена Рыбакина Бейжің (Қытай) WTA 1000 турнирінің үшінші айналымына шыға алмады.
Жарысты екінші айналымнан бастаған қазақстандық теннисші әлемдік рейтингіде 118-орында тұрған армениялық, түбі ресейлік Алина Чараевамен шеберлік байқасты.
Бастапқы партияда Е.Рыбакина 6:3 есебімен басымдылық танытты. Алайда бұдан кейін екі сетте есе жіберді — 4:6, 3:6.
Екі сағат 12 минутқа созылған бәсекеде Рыбакина 3 эйспен бірге 6 брейк-пойнттың төртеуін пайдаланды. Чараева 6 эйс, 5 брейкпен (8 брейк-пойнт) ерекшеленді.
Осылайша, қазақстандық теннисші күтпеген жерден жарыс жолынан шығып қалды. Бұл оның АҚШ ашық чемпионатында жеңімпаз атанғаннан кейінгі алғашқы матчы еді.
Сенсациялық жеңіске жеткен Алина Чараева үшінші айналымда рейтингіде 129-сатыдағы ұлыбританиялық Сонай Карталмен ойнайды.
Еске сала кетейік, бұдан бұрын Александр Бубликтің жұптық сында Бейжің турнирінің жартылай финалына шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).