НҰР-СҰЛТАН. ҚазАқпарат – Қазақстанның бірінші, әлемнің 20-ракеткасы Елена Рыбакина Уимблдон турнирінің үшінші айналымына өтті, деп хабарлайды ҚазАқпарат тілшісі.
Осы «Үлкен дулыға» додасының 18-ракеткасы болып тіркелген Е.Рыбакина екінші айналымда рейтингте 120-сатыда тұрған америкалық Клэр Льюмен шеберлік байқасты.
Қазақстандық теннисші 1 сағат 22 минутқа созылған матчта 6:4, 6:4 есебімен жеңіске жетті.
Бәсеке барысында Е.Рыбакина 7 эйс жасап, үш брейк-пойнтты түгелдей пайдаланды. Қарсыласы 5 эйс, 1 брейкпен шектелді.
Е.Рыбакина төртінші айналымға шығу үшін әлемнің 18-інші, осы жарыстың 15-ракеткасы, грекиялық Мария Саккари немесе рейтингте 46-сатыдағы америкалық Шелби Роджерстің біреуімен таласады.
Осылайша 22 жастағы Рыбакина өз спорттық жолында алғаш рет Уимблдон турнирінің үшінші айналымына шығып отыр.
Еске сала кетейік, бұдан бұрын Юлия Путинцеваның екінші айналымға шыққанын, ал Зарина Диястың жеңіліп қалғанын жазған болатынбыз.
Сондай-ақ Александр Бублик алғаш рет Уимблдон турнирінің екінші айналымына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).