АСТАНА. ҚазАқпарат - Қазақстандық Елена Рыбакина жұптық сында Мадрид мастерс турнирінің екінші айналымына шықты, деп хабарлайды ҚазАқпарат тілшісі.
Қазақстандық теннисші ресейлік Анастасия Павлюченковамен бірге бастапқы кездесуін жапониялықтар Шуко Аояма - Ена Шибахарамен өткізді.
Қазақстандық-ресейлік жұп биыл жұптық сында Аустралия ашық чемпионатының финалына дейін жеткен қарсыластарын ойсырата ұтты - 6:0, 6:1.
Небәрі 51 минутқа созылған матчта Е.Рыбакина мен А.Павлюченкова 4 эйс жасап, 8 брейк-пойнттың алтауын пайдалана білді.
Жарыстың екінші айналымында Рыбакина мен Павлюченкова мажарстандық Тимеа Бабош - қазақстандық Анна Данилина немесе украиналық Марта Костюк - румыниялық Елена Габриэла Рузе жұптарының біреуімен шеберлік байқасады.
Елена Рыбакина жекелей сында екінші айналымда ресейлік Анна Калинскаямен ойнайды.
Еске сала кетейік, бұдан бұрын Юлия Путинцеваның Мадрид мастерс турнирін сәтті бастағанын жазған болатынбыз.
Сондай-ақ Александр Бублик Мадрид мастерс турнирінің екінші айналымына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).