Елордада баласын вокзал маңында тастап кеткен ана психиатриялық есепте тұрған

АСТАНА. KAZINFORM – Осыдан бірер күн бұрын елордада 3-4 жасар баланы далада тастап кеткен анаға іздеу салынған еді. Баласын тастаған ана табылды. Бұл туралы Көліктегі полиция департаментінің баспасөз қызметі хабарлайды. 

- Астана станциясындағы желілік полиция басқармасының қызметкерлері жедел-іздестіру нәтижесінде баласын вокзал маңында қалдырған ананы анықтап, полицияға жеткізді. Ол бұрын психиатриялық диспансерлік есепте тұрған, - делінген хабарламада.

Қазір анаға қатысты баланы қауіп-қатерге қалдыру фактісі бойынша тергеу жүріп жатыр. 

- Бала Астана қаласы әкімдігінің өмірлік қиын жағдайдағы балаларды қолдау орталығына жіберілді, - дейді көліктегі полиция департаментінің баспасөз қызметінен. 

Сондай-ақ Қылмыстық-процестік кодекстің 201-бабына сәйкес өзге ақпарат жариялауға жатпайтыны ескертілді. 

Еске сала кетейік, 8 қаңтарда Астанада баласын вокзал маңында жалғыз қалдырып кеткен анаға іздеу салынғаны туралы хабарлаған едік.

Тастанды бала жайлы ақпарат алдымен желіде тарады.