ҚЫЗЫЛОРДА. ҚазАқпарат - Бүгін қызылордалық құтқарушылар «Қызылорда-Жезқазған» жолының бойында күн суықта бұзылып қалған автобустың 37 жолаушысына қол ұшын созды, деп хабарлайды ҚазАқпарат тілшісі.
Облыстық төтенше жағдайлар департаментінің кезекші бөліміне сағат 15.22-де хабар келіп түсті. Онда «Қызылорда-Жезқазған» жолының 135 шақырымында «Setra» жолаушылар автобусы бұзылып қалғаны айтылған.
Оқиға орнына төтенше жағдайлар саласы мамандары жедел жетті. Автобуста барлығы 37 жолаушы бар екені анықталды.
Жолаушылар көлігінің Нұр-Сұлтан қаласынан Шымкентке бет алғаны белгілі болды.
«Барлық жолаушы құтқарылды. Бұзылып қалған автобус «КаМАЗ» көлігімен Қызылорда қаласына дейін жеткізілді. Жолаушылар одан әрі Шымкенттен келген өзге автобуспен межелі жеріне жететін болды», - деп мәлім етті Қызылорда облысы Төтенше жағдайлар департаментінің Өрт сөндіру және авариялық құтқару жұмыстары қызметінен.
Естеріңізге сала кетелік, бұдан бұрын да Нұр-Сұлтаннан шыққан жолаушылар автобусы Қызылорда трассасында тұрып қалған болатын.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.