Елордалық оқушылар соңғы қоңырауда вальс билемейтіні рас па
АСТАНА. KAZINFORM — Қазір желіде астаналық мектеп түлектерінің соңғы қоңырау салтанатты іс-шарасын өткізу мәселесі қызу талқыланып жатыр.
Әлеуметтік желіде соңғы қоңырау салтанатты шарасын өткізуге қатысты елордалық оқушылар таратқан жазба жарияланды.
— Құрметті ата-аналар! 25 мамыр күні салтанатты жиын мектеп тарапынан ұйымдастырылады. Вальс билеу, лента тағу алынып тасталынды, — деп жазылған мәтінде.
Осылайша, елордалық мектеп түлектері соңғы қоңырау салтанатына шектеу қойыла ма деп алаңдаулы.
Істің мән-жайын қалалық Білім басқармасынан анықтадық.
— Ешқандай шектеу көзделмеген. Бұл мәселеге қатысты ата-аналармен арнайы жиналыс ұйымдастырылады, — деген жауап алдық басқарманың баспасөз қызметінен.
Еске сала кетсек, өткен жылы Оқу-ағарту министрі Ғани Бейсембаев соңғы қоңырау кезінде ата-аналар мектептегі мерекелік іс-шараларға шығындалып, балаларды ысырапқа үйретпеуі керектігін айтқан еді.