Ертең күн райы қандай болады

АСТАНА. KAZINFORM —  Ертең елдің басым бөлігінде қар мен жаңбыр жауып, жел күшейеді.

«Қазгидромет» мәліметінше, 9 ақпан күні Қазақстан аумағының басым бөлігінде атмосфералық фронттардың өтуіне байланысты жауын-шашынды болып (жаңбыр, қар), боран соғып, көктайғақ болады, тұман басып, жел күшейеді.

Тек республиканың шығысында жауын-шашынсыз ауа райы болжанып отыр.

Батыста, оңтүстікте, Алматы облысының таулы аудандарында, Абай облысының оңтүстігі мен орталығында, Шығыс Қазақстан облысының солтүстігінде, шығысында және орталығында, Жетісу облысындағы Алакөл көлдері маңында, сондай-ақ Түркістан облысының таулы асуларында күндіз желдің жылдамдығы секундына 30 метр және одан да жоғары болуы мүмкін.

Айта кетелік ауа райына байланысты екі облыста жол жабылған еді.