АСТАНА. KAZINFORM – Тиранада (Албания) грек-рим күресінен олимпиадалық емес салмақтарда өтіп жатқан әлем чемпионатында қазақстандық Ержет Жарлықасын күміс жүлдегер атанды.
Ержет Жарлықасын 63 келіге дейінгі салмақта финалда әзербайжандық Нихат Маммадлимен чемпиондық атақты сарапқа салды.
Ержет биыл Азия біріншілігінде үздік шықса, Нихат бұған дейін екі мәрте Еуропада топ жарып, 2022 жылы 23 жасқа дейінгілер арасында әлем чемпионатының күміс жүлдегері атанған екен.
Бірінші кезеңде төреші Ержетке бір ұпай беріп, қарсыласын төрттағанға қойғанымен, қазақстандық балуан ол мүмкіндігін пайдалана алмады. Екінші кезеңде өзі әдіс жасаймын деп, Нихаттың ұпай алуына жол беріп қойды - 1:6.
Осылайша, Е.Жарлықасынға күміс жүлде бұйырды.
Еске сала кетейік, бұдан бұрын Ержет Жарлықасынның грек-рим күресінен әлем чемпионатының финалында өнер көрсететінін жазған болатынбыз.
Сондай-ақ Жәмила Бақбергенова үшінші рет әлем чемпионатының финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).