АСТАНА. KAZINFORM – Футболдан Еуропа лигасының жетінші турында Түркияның «Бешикташ» командасы Ыстанбұлда Испанияның «Атлетик» клубын қабылдады.
Биыл атақты норвегиялық ойыншы әрі бапкер Уле Гуннар Сульшер тізгінін ұстаған «Бешикташ» осыған дейін Еуропа лигасында жалпы кестеде 6 ұпаймен 28-орында тұрған еді.
Ал жеңілмей келе жатқан «Атлетик» (Бильбао) көш бастаушылардың бірі еді. Соған қарамастан, ыстанбұлдық клуб азулы қарсыласын 4:1 есебімен ұтты. Милош Рашица қос голдың авторы атанса, Рафа Силва мен Жоау Мариу бір-бірден көзге түсті.
Қонақтардан Унаи Гомес жалғыз доппен жауап қайырды.
Қазақстан құрамасының ойыншысы Бақтиер Зайнутдинов алаңға 69-минутта шығып, өз командасының жеңіске жетуіне үлесін қосты.
Осы жеңістен кейін 9 ұпай жинаған «Бешикташ» Еуропа лигасында 18-орынға көтерілді. «Атлетик» 16 ұпаймен екінші сатыда қалды.
Бастапқы 24 орынға іліккен клубтар плей-офф кезеңіне жолдама алады.
«Бешикташ» Түркия чемпионатында 31 ұпаймен 6-сатыда келеді.
Еске сала кетейік, бұдан бұрын бүгін УЕФА Чемпиондар лигасы негізгі кезеңінің жетінші туры басталатынын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).