Шешім Эурайоки муниципалитетінде орналасқан Posiva компаниясының Onkalo жерасты кешеніне қатысты қабылданды. Нысан пайдаланылған ядролық отынды түпкілікті көмуге арналған.
Финляндияның Радиациялық және ядролық қауіпсіздік басқармасы (STUK) тамыз айында-ақ жобаға оң қорытынды беріп, қажетті талаптардың орындалғанын растаған. Ведомство бұл шешімді Финляндия мен халықаралық қауымдастық үшін маңызды белес деп атады. Жобаға ондаған жыл бойы жүргізілген зерттеулер мен әзірлемелер негіз болған.
LUT университетінің ядролық энергетика профессоры Юхани Хювяринен Onkalo кешенінде қолданылатын технологияға алғашында Швецияда лицензия беріліп, кейін Финляндияда жетілдірілгенін атап өтті. Оның айтуынша, басқа елдерде осындай жобаларды іске асырудың созылуына технологиялық емес, негізінен саяси кедергілер себеп болған.
Лицензияның берілуі кешеннің бірден іске қосылатынын білдірмейді. Posiva компаниясы нысанды пайдалануға дайындау жұмыстарын аяқтап, қажетті сынақтар мен тексерулерден өтуі керек. Осыдан кейін STUK кешенді пайдалануға беруге жеке рұқсат ұсынады.
Пайдаланылған ядролық отынды түпкілікті көму жұмыстарының нақты қашан басталатыны әзірше белгісіз.
Еске салайық, бұған дейін Финляндия ядролық қаруды әкелуге және транзиттеуге қойылған тыйымды алып тастағанын хабарлаған едік.