НҰР-СҰЛТАН. ҚазАқпарат - Футболдан Қазақстан ұлттық құрамасы наурыз айында Литвамен жолдастық кездесу өткізеді, деп хабарлайды ҚазАқпарат тілшісі Қазақстан футбол федерациясына сілтеме жасап.
Естеріңізге сала кетелік, 2020 жылдың 23-30 наурыз аралығында ұлттық құрама Талғар қаласында оқу-жаттығу жиынын өткізеді. Дайындық шарасы барысында Алматыда екі жолдастық кездесу өткізу жоспарланған. Алдымен 27 наурызда Литвамен шеберлік байқасса, 30 наурызда Армениямен ойнайды.
Қазір Литва құрамасын 52 жастағы маман Вальдас Урбонас жаттықтырады. 2020 жылғы Еуропа чемпионаты іріктеу кезеңінде аталмыш құрама В тобында Украина, Португалия, Сербия, Люксембург құрамаларымен ойын көрсетті. FIFA-ның соңғы рейтингі бойынша 131 орында тұр. Ал Қазақстан аталмыш рейтингте 118 орында.
Екі құрама бұдан бұрын бір мәрте кездесті. 2014 жылдың 5 наурызында Түркияның Анталия қаласында өткен жолдастық кездесуде 1:1 есебі тіркелді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.