НҰР-СҰЛТАН. ҚазАқпарат – Футболдан Қазақстан чемпионатының 19-турында «Ақтөбе» өз алаңында Оралдың «Ақжайығын» қабылдады, деп хабарлайды ҚазАқпарат тілшісі.
Турнир кестесінде ақтөбеліктер оныншы сатыда тұрса, оралдықтар төртінші орында келе жатқан еді.
«Ақжайық» сапында түрлі себептерге байланысты бірнеше ойыншысы алаңға шыға алған жоқ. Дегенмен бірінші тайм соңына таман осыған дейінгі матчтарда нәтижелі пастарымен көзге түсіп жүрген ресейлік жартылай қорғаушы Евгений Козлов есеп ашты.
Екінші таймда ақтөбелік 19 жастағы Максим Самородов қос голдың авторы атанып, командасына жеңіс сыйлады – 2:1.
Бұл турдан кейін украиналық маман Владимир Мазяр жаттықтыратын «Ақжайық» 28 ұпаймен әзірге төртінші орнында қалды. Ал қазақстандық маман, кезінде оралдық клубтың да тізгінін ұстаған Вахид Масудов баптайтын ақтөбеліктер 23 ұпаймен тоғызыншы орынға көтерілді.
Оралдықтар келесі кездесуін 11 қыркүйекте біріншілікте қайтадан көш бастаған «Астанамен» өткізеді.
Еске сала кетейік, бұдан бұрын Оралдың «Ақжайығына» жаңадан ойыншылар алынғанын жазған болатынбыз.
Фото: Айбатыр Нұраш
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).