ОРАЛ. ҚазАқпарат – Футболдан Қазақстан чемпионатының оныншы турында Оралдың «Ақжайығы» өз алаңында «Мақтаарал» командасын қабылдады, деп хабарлайды ҚазАқпарат тілшісі.
Турнир кестесінде қонақтар көш соңында келе жатса, осыған дейін екі рет қатарынан ұтылған алаң иелеріне де ұпай ауадай қажет еді.
«Ақжайықтың» бас бапкері, украиналық маман Владимир Мазяр өткен матчтағы құрамға бір ғана өзгеріс енгізіп, ресейлік Артур Газданов бірден ойынға қосылды.
Бірінші таймда қос команда шабуылдауға тырысып баққанымен, есеп ашылған жоқ.
Екінші кезеңде 55-минутта екінші ескерту қағазын алған «Мақтаарал» сапындағы ресейлік Расамбек Ахматов алаңнан қуылды. Алайда, бұдан кейін алаң иелері шабуылға көшкенімен, ештеңеге қол жеткізе алмады. Есеп – 0:0.
Бұл ойыннан кейін 11 ұпай жинаған В. Мазярдың шәкірттері 10-орынға көтерілді.
Он бірінші турда 15 мамырда «Ақжайық» «Таразға» қонаққа барса, «Мақтаарал» өз алаңында Ақтаудың «Каспийін» қабылдайды.
Еске сала кетейік, бұдан бұрын футболдан ел чемпионатында «Ақтөбенің» «Ақжайықты» ұтқанын, Қазақстан ұлттық құрамасына жаңа бас бапкер тағайындалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).