АСТАНА. ҚазАқпарат – Футболдан Қазақстан чемпионатының 25-турында «Каспий» Ақтауда Оралдың «Ақжайығын» қабылдады, деп хабарлайды ҚазАқпарат тілшісі.
Ақтаулықтар турнир кестесінде 30 ұпаймен 8-орында тұрса, оралдықтардың жағдайы мүшкіл, соңғы сатыда еді. Сондықтан, «Ақжайыққа» ұпай керегірек болды.
Бірінші таймда алаң иелері қауіптірек шабуылдағанымен, есеп ашылған жоқ.
Ойынның екінші кезеңінде «Ақжайықтың» мүмкіндіктері болғанымен, оны пайдалана алмады. Қорытынды есеп – 0:0.
Осылайша, небәрі 25 ұпай жинаған оралдықтар бұрынғысынша көш соңында қалды.
Ел чемпионатының соңғы турында «Ақжайық» 6 қараша күні өз алаңында Қостанайдың «Тобылын» қабылдаса, ақтаулықтар Петропавлда «Қызылжармен» ойнайды.
Еске сала кетейік, бұдан бұрын футболдан Қазақстан чемпионатында «Мақтаарал» «Ақжайықты» жеңгенін жазған болатынбыз.
Суреттерді түсірген Айбатыр НҰРАШ
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).