НҰР-СҰЛТАН. ҚазАқпарат – Футболдан Қазақстан чемпионатының алтыншы турында Ақтаудың «Каспийі» өз алаңында «Атырауды» қабылдады, деп хабарлайды ҚазАқпарат тілшісі.
Өткен турда «Каспий» Алматыда «Қайратқа», ал атыраулықтар өз алаңында «Ақжайыққа» 0:1 есебімен есе жіберген еді.
Сондықтан қос команда да ұпай алып, жағдайын жақсартуға ұмтылды. Бірінші тайм аяқталар сәтте қонақтардың қорғаушысы Матеус Биссидің қателігін пайдаланған Аслан Әділ есеп ашты.
Екінші таймда 52-минутта бұрыштамадан берілген доптан кейін М.Бисси таразы басын теңестірді. Әйтсе де 89-минутта алаңға тыңнан қосылған Алмас Арменов жеңіс голын соғып кетті. Есеп 2:1, «Каспийдің» пайдасында.
Бұл ойыннан кейін 13 ұпай жинаған ақтаулықтар бірінші орынға көтерілді. Дегенмен оларды осы турда басқа командалар қуып жете алады. Орталық матч бүгін Қостанайда өтеді, онда ел чемпионы «Тобыл» осыған дейін көш бастаған «Қайратты» қабылдайды.
Еске сала кетейік, бұдан бұрын футболдан Қазақстан чемпионатында «Ақжайықтың» «Астанадан» басым түскенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).