АСТАНА. KAZINFORM — Хорватияда Футболдан 17 жасқа дейінгілер арасында өткен Еуропа чемпионатының іріктеу турнирінде Қазақстан құрамасы өз тобында бірінші орынға ие болды.
В дивизионында Бауыржан Сағындық баптайтын қазақстандықтар алғашқы ойында сенсация жасап, Хорватияны 2:1 есебімен жеңген еді.
Одан кейін Нидерланд құрамасына 1:4 есебімен есе жіберді.
Бүгін соңғы кездесуінде қазақстандықтар Албанияны 2:1 есебімен тізе бүктірді.
Қазақстан құрамасынан Роман Черноморец (21-минут) пен Абылай Жылқайдар (58-минут) гол соғып, көзге түсті. Бұған албаниялықтар 95-минутта Арменда Мусликаның голымен жауап қайырды.
Осылайша, 6 ұпай жинаған Қазақстан командасы өз тобында бірінші орын алды. Хорватия (6 ұпай) екінші сатыда.
Сөйтіп Қазақстан мен Хорватия А дивизионына жолдама алды.
Енді Бауыржан Сағындықтың шәкірттері 2026 жылдың көктемінде Еуропа чемпионатының финалдық кезеңіне берілетін жолдама үшін таласады.
Еске сала кетейік, бұдан бұрын футболдан Қазақстан жасөспірімдерінің сенсациялық жеңіске қол жеткізгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).