НҰР-СҰЛТАН. ҚазАқпарат - Футболдан UEFA конференция лигасы топтық кезеңінің төртінші турында қазақстандық «Қайрат» Алматыда Әзербайжанның «Карабах» командасына есе жіберді, деп хабарлайды ҚазАқпарат тілшісі.
Бүгінгі ойында қос команда жеңіске жету жолын іздеді. Дегенмен бірінші кезеңде таблодағы есеп өзгерген жоқ.
Екінші кезеңде 57-минутта әзербайжандық командадан Ибраим Ваджи есеп ашса, одан кейін алматылық клубтан Хосе Канте таразы басын теңестірген еді.
Ал 72-минутта Абделла Зубир «Карабахты» қайтадан алға шығарды.
«Қайрат» қарсыласына 1:2 есебімен есе жіберді.
Енді «Қайрат» алдағы ойынын 25 қарашада Алматыда Швейцарияның «Базель» командасына қарсы өткізеді.
«Қайрат» H тобында сынға түседі. Қарсыластары - Швейцарияның «Базель», Әзербайжанның «Карабах» және Кипрдің «Омония» командалары.
Алғашқы үш турда «Қайрат» командасы небәрі бір ұпай жинады. Алдымен өз алаңында Кипрдің «Омониясымен» 0:0 есебімен тең түсті.
Одан кейін сырт алаңда Швейцарияның «Базель» клубына 2:4, Әзербайжанның «Карабах» 1:2 есебімен есе жіберді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.