АСТАНА. KAZINFORM - Еліміздің атынан Түркияның Стамбул қаласында өтетін грек-рим күресінен лицензиялық турнирге қатысатын балуандар белгілі болды.
Біріккен күрес әлемі (UWW) 2024 жылғы Париж Олимпиаасына жолдама еретін соңғы лицензиялық турнирге қатысатын балуандар тізімін жариялады. Олардың қатарында қазақстандық Дінмұхаммед Қошқар (67 келі) мен Юсуф Мациев (97 келі) бар.
Ел біріншілігі финалында Дінмұхаммед Қошқар Мейіржан Шермаханбеттен есе жіберген еді. Сондықтан екінші нөмірлі спортшы ретінде Қырғызстан астанасы Бішкек қаласындағы Азия чемпионатына қатыса алған жоқ.
Ал Юсуф Мациев құрлық біріншілігінің финалына шығып, күміс жүлдегер атанған.
Ел құрамасында грек-рим күресінен 4 жолдама бар. Мұндай мүмкіндікке Айдос Сұлтанғали (60 келі), Демеу Жадыраев (77 келі), Нұрсұлтан Тұрсынов (87 келі) және Әлімхан Сыздықов (130 келі) ие болды.
Еске салсақ, қазірге дейін ел құрамасы еншісінде Париж Олимпиадасының 49 жолдамасы бар.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.