ИКАО Қазақстанның әуе қауіпсіздігіне аудит жүргізеді

АСТАНА. KAZINFORM — Биыл қыркүйекте халықаралық азаматтық авиация ұйымы (ИКАО) еліміздің әуе қауіпсіздігіне аудит жүргізеді. Бұл туралы Көлік министрлігі Азаматтық авиация комитетінің төрағасы Салтанат Томпиева мәлім етті.

— Авиациялық қауіпсіздік шаралары тұрақты түрде жүргізіледі. Бізде барлық стандартқа толық сәйкес келетін реттеуші орган бар. Авиациялық қауіпсіздікке қатысты тексерулер жыл сайын барлық әуежайда өткізіледі. Заңнаманы қайта қарау жоспарланған болатын, (Алматы әуежайындағы оқиғадан кейін — автор.) қазір бұл мәселе қаралып жатыр, — деді Салтанат Томпиева Сенатта өткен іс-шара барысында.

Сондай-ақ комитет басшысы биыл қыркүйекте халықаралық азаматтық авиация ұйымы (ИКАО) әуе қауіпсіздігі бойынша аудит жүргізетінін тілге тиек етті. 

— Біз өзіміздің жоғары нәтижемізді растап, авиациялық қауіпсіздік деңгейіне сәйкестікті дәлелдеуді мақсат етіп отырмыз. Көлік министрлігі ИКАО аудитінің қорытындылары бойынша өзгерістер енгізеді, — дейді ол.

Қазақстан халықаралық азаматтық авиация ұйымына (ИКАО) былтыр жазда тіркелді. 

Айта кетсек, ИКАО Қазақстанның Ақтау маңындағы ұшақ апатын тергеу бойынша есебін жоғары бағалады. 

Еске салайық, биыл 7 наурыз күні Алматы әуежайында ер адам қызды кепілге алып, көпшілік алдында пышақ кезенгенін жазғанбыз. 

Артынша болған оқиғаға қатысты үш қылмыстық іс қозғалды. 

Сондай-ақ Мемлекет басшысының Жарлығымен қиын-қыстау жағдайда көрсеткен ерлігі мен жанқиярлығы үшін Мұса Сайранбайұлы Әбдірайым «Ерлігі үшін» медалімен наградталды.