Иранның Ислам революциясы сақшылар корпусы (КСИР) таратқан мәлімдемеге сәйкес, операцияны әскери-теңіз және әуе-ғарыш күштері бірлесіп жүргізген.
Мәлімдемеде Кувейттегі Арифджан және Әли әс-Салем әскери базалары, сондай-ақ Бахрейндегі Джуффайр ауданындағы нысандар мен Шейх-Иса әуе базасы нысанаға алынғаны айтылған.
Кейінірек Иран армиясы операция аясында Катардағы әскери нысандарға да шабуыл жасалғанын хабарлады. Сондай-ақ соққылар кезінде шабуылдаушы ұшқышсыз ұшу аппараттары қолданылғаны мәлім болды.
Иран тарапының мәліметінше, Кувейттегі Patriot әуе қорғаныс зымыран кешені, Катардағы ерте ескерту бекеті және Бахрейндегі АҚШ әскери күштерінің жанармай инфрақұрылымы нысанаға алынған.
Өз кезегінде Кувейт билігі әуе шабуылына қарсы қорғаныс жүйелері Иран аумағынан ұшырылған үш баллистикалық зымыранды, бір қанатты зымыранды және он ұшқышсыз ұшу аппаратын әуеде жойғанын мәлімдеді.
Кувейт тарапының дерегінше, зымыран қалдықтарының құлауынан бірнеше нысан зақымданып, бір адам жараланған. Оның жағдайы тұрақты деп бағалануда. Елдің Сыртқы істер министрлігі Иранның әрекетін қатаң айыптап, оны Кувейттің егемендігін өрескел бұзу және Тегеранның қайталанып отырған дұшпандық саясатының көрінісі деп атады.
Бахрейн билігі де әуе дабылын жариялады. Елдің Ішкі істер министрлігі тұрғындарды сабыр сақтап, жақын маңдағы қауіпсіз орындарға паналауға шақырды.
КСИР бұл операцияны АҚШ-тың Иранға жасаған соққыларына берілген «жазалау сипатындағы жауаптың» алғашқы кезеңі деп бағалап, егер шабуылдар қайталанса, аймақтағы АҚШ-тың өзге де әскери нысандары нысанаға алынатынын ескертті.
Еске салайық, бұған дейін АҚШ бейсенбіге қараған түні Иран аумағындағы 90 нысанға әуе соққысын жасаған болатын. Оған дейінгі күні АҚШ Ирандағы 80 нысанға шабуыл жасап, кейін Иран Кувейт пен Бахрейндегі америкалық әскери нысандарға жауап соққысын жасағаны хабарланған еді.