IX қысқы Азия ойындары Харбинде салтанатты түрде ашылды
ХАРБИН. KAZINFORM –Қытайдың Харбин қаласында өтіп жатқан IX қысқы Азия ойындарының салтанатты ашылу шарасы жершілікті уақыт бойынша 7 ақпан күні сағат 20:00-де ресми түрде басталды.
Салтанатты шараға Қытай Халық Республикасының төрағасы Си Цзиньпин, Қырғызстан Президенті Садыр Жапаров, Пәкістан Президенті Асиф Али Зардари, Таиланд премьер-министрі Пхетхонгтхан Чинават, Корея Ұлттық ассамблея спикері У Вон Сик, Халықаралық Олимпиада комитетінің (ХОК) президенті Томас Бах және Азия Олимпиадалық кеңесінің (АОК) бірінші вице-президенті Тимоти Фолк Янг-Тинг қатысты.
Спортшылардың стадионға кіру рәсімі шамамен 50 минутқа созылады. Қазақстан делегациясы алаңға 12-болып кірді. Хоккейші Әділ Бекетаев және шорт-трекші Ольга Тихонова Қазақстан құрамасының туын ұстап шықты.
Осыдан кейін, Қысқы Азия ойындарын ұйымдастыру комитеті бас хатшысының орынбасары, атқарушы комитет директорының орынбасары және Харбин қалалық халық үкіметі әкімінің орынбасары Чжан Хайхуа мен АОК бірінші вице-президенті Тимоти Фолк Янг-Тинг сөз сөйледі. Қытай төрағасы Си Цзиньпин ашылу салтанаты ашық деп жариялады.
Айта кетейік, Қысқы Азиадаға Қазақстаннан 137 спортшы қатысады. Жарыстар Харбин қаласында және Ябули тау шаңғы курортында өтеді.
Сондай-ақ, додаға Азияның 34 елінен/аймақтарынан барлығы 1275 спортшы (755 ер, 520 әйел) қатысып, рекордтық көрсеткішке жетті.