АСТАНА. KAZINFORM – Қазақстанда қант диабетімен ауыратын балалар мен жасөспірімдер саны төрт жылда 1435 адамға артқан. Бұл туралы Денсаулық сақтау министрлігі Kazinform агенттігінің ресми сауалына берген жауабында мәлімдеді.
Ведомство дерегінше, 2022 жылы елімізде 1–17 жас аралығындағы 5387 бала қант диабетімен есепте тұрған. 2023 жылы олардың саны 5913-ке, 2024 жылы 6286-ға, ал 2025 жылы 6822-ге жеткен. Осылайша, төрт жылда көрсеткіш 26,6 пайызға өскен.
– 2025 жылғы дерек бойынша, қант диабетімен ауыратындардың 4788-і 1–14 жас аралығындағы балалар болса, 2034-і 15–17 жас аралығындағы жасөспірімдер, - делінген хабарламада.
Денсаулық сақтау министрлігінің мәліметінше, 1-типті қант диабеті негізінен балалар мен жасөспірімдерде кездеседі. Ал 2-типті диабет көбіне 40–75 жас аралығындағы азаматтарда анықталады.
Қазақстанда жарты миллионнан астам адам қант диабеті диагнозымен есепте тұр.
Назерке Сүйіндік
Әл-Фараби атындағы Қазақ ұлттық университетінің түлегі. Ұлыбританиядағы Sussex университетінде магистр дәрежесін алған. Л.Н. Гумилев атындағы ЕҰУ-дің саясаттану мамандығы бойынша PhD докторанты. Бұған дейін BAQ.kz, Strategy2050.kz, QazaqTimes.kz секілді ақпараттық платформаларда жұмыс істеген. Қазір «ҚазАқпарат» халықаралық ақпарат агенттігінің тілшісі. Халықаралық саясат, дипломатия, медиа, ақпараттық саясат және қоғамдық-саяси мәселелерді тұрақты түрде жазып келеді.