Қарағандылық байкерлер тобы референдумда дауыс берді
ҚАРАҒАНДЫ. KAZINFORM - Кеншілер шаһарындағы байкер клубының мүшелері Қазақстанда АЭС салу мәселесі бойынша референдумға қатысты. Мотоцикл тізгіндеген топ Қарағандыдағы №72 референдум учаскесінде дауыс берді, деп хабарлайды Кazinform агенттігінің тілшісі.
Сайлау учаскесіне «Шыңғысхан» байкер клубының мүшелері өздерінің темір тұлпарларымен келді. Пікірлестер жұмылып, өздерінің азаматтық борышын орындап, дауыс беруге қатысу шешімін қабылдағандарын айтады.
«Менің ойымша, бұл референдум Қазақстан халқына қандай да бір мәселеге қатысты өз пікірін білдіруге көмектеседі, халықтың пікірін ескеру қажет. Өз жеке ойым осындай. Мұндай шаралар мемлекеттің, энергетика саласының, энергия қызметіне қатысты барлық маңызды мәселелерге арналуы керек. Өз пікіріңді білдіру маңызды бұл ретте. Сайлауды да, референдумды да ешқашан жіберген емеспін», - дейді байкерлер клубының мүшесі Дмитрий Коцар.
Айта кету керек, клуб мүшелері осындай іс-шараларға қатысуда бір-бірін қолдап қана қоймай, балаларына үлгі көрсетеді. Байкерлердің бірі Алексей Лапшин референдумға 10 жасар қызымен бірге келді.
«Мен бүгін қызыммен келдім. Жалпы, бұл біздің дәстүрге енгендіктен, барлық отбасы мүшелері біздің еліміздің болашағына қатысты өз ойын ортаға салуы тиіс және жанашырлық танытуы керек. Яғни, даму тұрғысынан қандай да бір шешім қабылдау біз үшін маңызды. Біз осыған дейін үйімізде алдағы референдум туралы әңгімелестік және талқыладық. Балам «Әке, бұл не және не үшін қажет?» деп сұрады. Бұл еліміздің дамуы үшін керек екенін түсіндірдік. Тиісінше, менің ойымша, бұл әр отбасы үшін үйреншікті болуы керек. Өйткені біз болашағымызға немқұрайлы қарамауымыз керек», - деп есептейді Алексей Лапшин.
Еске салайық, бүгін қазақстандықтар атом электр станциясын салу мәселесі бойынша жалпыұлттық референдумда дауыс беріп жатыр.
Республикалық референдум бюллетенінде бір ғана сауал болады:
— Сіз Қазақстанда атом электр станциясын салуға келісесіз бе?
Дауыс беруші жауаптың екі нұсқасының бірін таңдайды:
— «Иә, келісемін» немесе, «Жоқ, келіспеймін».
1 шілдедегі жағдай бойынша ел көлемінде 12 176 968 адам референдумда дауыс беруге хақылы.