Қасым-Жомарт Тоқаев Ақордада Конго Президентін қарсы алды
АСТАНА. KAZINFORM — Ақордада Мемлекет басшысы Қасым-Жомарт Тоқаев елімізге мемлекеттік сапармен келген Конго Демократиялық Республикасының Президенті Феликс Чисекедиді қарсы алды.
Алдымен Қасым-Жомарт Тоқаев пен Феликс Чисекеди бір-біріне ресми делегация мүшелерін таныстырды.
Осыдан кейін мәртебелі мейманның сапарына орай салтанатты рәсімдер залында сап түзеген құрмет қарауылының бастығы Мемлекет басшыларына сәлемдік баянат берді.
Президент оркестрі екі елдің мемлекеттік Әнұранын орындады.
Әнұрандарды тыңдап болғаннан кейін Қасым-Жомарт Тоқаев пен Конго Демократиялық Республикасының Президенті кілемше бойымен Қазақстан Республикасының Мемлекеттік Туына қарай жүрді.
Оның алдына келгенде мейман тоқтап, басын сәл иіп, өзінің құрметін білдірді. Сонан соң Конго Демократиялық Республикасының Президенті мен Президент құрметті қарауыл сапының бойымен жүрді. Құрметті қарауыл бастығымен қоштасты.
Қазіргі уақытта жоғары деңгейдегі келіссөздер өтеді. Онда екіжақты ынтымақтастықтың даму перспективалары талқыланады.
Айта кетейік, тамыз айының соңында Мемлекет басшысы Конго Президентінің арнаулы өкілі Патрик Мпойи Луабеяны қабылдаған болатын.