АСТАНА. KAZINFORM – Омбылық қазақ қызы Салтанат Меденова Серпухов қаласында (Мәскеу облысы) бокстан әйелдер арасында өткен 25-інші Ресей чемпионатында жеңімпаз атанды.
Салтанат 81 келіге дейінгі салмақта финалда Краснодар өлкесінің өкілі, өткен жылғы әлем чемпионы Анастасия Демурчянды ұтты.
Осылайша, С.Меденова үш дүркін Ресей чемпионы атанды.
«Әлем чемпионы Анастасия Демурчянмен өткен финалдық жекпе-жек ең ауыр айқастың бірі болды. Психологиялық жағынан біраз қиындыққа түскенімен, рингке шыққаннан кейін жеңілдеп сала бердім. Анастасияның менің салмағыма өткенін білдім. Сондықтан оған дайындалдым. Мен үш дүркін Ресей чемпионы атандым. Тезірек үйге жетіп, туыстарымды, анамды құшақтағым келеді», деді Салтанат Меденова.
Ресей біріншілігіне 48 өңірден 172 спортшы қатысып, бақ сынады.
Омбы қаласында туып-өскен Салтанат Меденова биыл БРИКС ойындарында да алтыннан алқа таққан болатын.
Еске сала кетейік, бұдан бұрын Қазақстан бокс федерациясының World Boxing құрамына енгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).