АСТАНА. KAZINFORM – Теннистен Қазақстан әйелдер құрамасы Билли Джин Кинг кубогының Корея Республикасымен елордада 16-17 қарашада өтетін плей-офф матчына дайындалып жатыр.
Қазақстан теннис федерациясы арбадағы теннисшілер үшін шеберлік сағатын ұйымдастырып, оған Юлия Путинцева, Анна Данилина, Зарина Дияс, Соня Жиенбаева және Сандуғаш Кенжебаева қатысты.
Арбадағы теннисшілер ұлттық құрама мүшелерімен жеке-жеке айналысып, ойын техникасы бойынша сұрақ қоюға мүмкіндік алды. Жаттығудан кейін қолтаңба алып, суретке түсті.
Құрама мүшелері арбадағы теннисшілерге ақыл-кеңестерін берді. Мұндай шеберлік сағаты арбадағы тенниспен айналысушылар қатарын көбейтуге септігін тигізеді.
Ұлттық құрама көшбасшысы Елена Рыбакина әуе рейсінің кідіріп, Астанаға кеш ұшып келуіне байланысты бұл іс-шараға қатыса алмады.
Еске сала кетейік, бұдан бұрын Дэвис кубогында Қазақстан жасөспірімдер құрамасының алғаш рет ширек финалға шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).