Қазақстан дзюдодан Азия кубогінде бірінші орынға ие болды
Қазақстан дзюдо федерациясының баспасөз қызметінен мәлім еткеніндей, еліміздің жастар мен жасөспірімдер құрамалары өз жас санаттарында медаль бойынша бірінші орынға ие болды.
Халықаралық дзюдо федерациясының (IJF) күнтізбесіне енген ресми рейтингтік жарысқа 2006-2007 жылғы жасөспірімдер мен 2003-2005 жылдары туған жас татами шеберлері қатысты.
«Жасөспірімдер мен жастар арасындағы Азия кубогі – біздің жас спортшыларымыз үшін шеберлігін шыңдауға жақсы алаң. Биыл тек Қазақстан емес, шетелден де қатысушылар қатары көбейді. Бекет Махмұтовты еске алуға арналған жасөспірімдер мен жастар арасындағы Азия кубогі осымен биыл алтыншы рет өткізіліп отыр. Жарыс статусы – халықаралық дзюдо федерациясының күнтізбесіне енген ресми рейтингтік жарыс. Жарыстың ұйымдастырылуын IJF төрешілер директорлары Даниэль Ласкау мен Армен Багдасаров мырзалар, Азия дзюдо одағының (JUA) өкілдері жоғары бағалауда. Азия кубогі аясында елімізде төрешілерге арналған семинар-емтихан өтті. Сондай-ақ, жарыс аяқталғаннан кейін Алматы қаласында осы жарысқа қатысқан құрамаларға арналған халықаралық жаттығу лагері ұйымдастырылады. Жастар – біздің болашағымыз. Сондықтан, дзюдодан келешекте жақсы көрсеткішке қол жеткізу үшін бүгіннен осылай жасөспірімдер мен жастарға жағдай жасап, халықаралық жарыстарды көптеп ұйымдастырып отыру керекпіз», - деп атап өтті Қазақстан дзюдо федерациясының бас хатшысы Асхат Житкеев.
Екінші орынға Өзбекстан спортшылары жайғасса (5 алтын, 6 күміс, 14 қола медаль), Моңғолия өкілдері үшінші орынды қанағат тұтты (2 алтын, 1 күміс, 1 күміс).
Атап өтсек, Қазақстан құрамасы сапынан Нұрбол Асқар (-50 кг), Нұрлан Исатаев (-55 кг), Еркебұлан Орынбаев (-66 кг), Еділ Ерболұлы (-73 кг), Досбол Балғабай (-81 кг), Шерхан Алпанов (+90кг), Зере Өтепқали (-40 кг), Сәулемай Сағитжан (-70кг), Гүлдана Теңгелбаева (+70кг) жеңімпаз атанса, Ақниет Шайменов (-66кг), Берікбол Жұманбеков (-90кг), Алихан Назымханов (+90кг), Тамила Әлиханова (-44 кг), Жібек Жайсаңбай (-63 кг), Руслана Махатова (+70кг) күміс жүлдеге қол жеткізді. Жеңіс тұғырының үшінші сатысына Ерболат Сыздық (-50 кг), Жалғас Күнесбаев (-60 кг), Дидар Аманжол (-66кг), Расул Мұхұм (-81 кг), Темірлан Нұрбеков (-90кг), Әсел Русланова (-40 кг), Іңкәр Құралбай (-44 кг), Кира Хегай (-48 кг), Аяулым Қалмырза (-52 кг), Дамеля Асылханова (-57 кг), Анисса Ибатолла (-70кг), Айымзада Думанқызы (+70кг) көтерілді.
IJF ережесіне сәйкес Азия кубогінің жеңімпаздары мен жүлдегерлеріне рейтингтік ұпай қосылады. Жарыс жеңімпаздарына –100, күміс жүлдегерге – 60, үшінші орын алғандарға 40 ұпайдан беріледі.
Ал бұл ұпайлар дзюдошыларға әлем чемпионатына қатысу мүмкіндігін алу үшін қажет. Сол себепті Балуан Шолақ атындағы спорт сарайында өткен байрақты бәсеке жас татами шеберлері үшін аса маңызды.
Жастар арасындағы бәсекеге Гонконг, Грузия, Грекия, Қырғызстан, Латвия, Моңғолия, Тәжікстан, Түркіменстан, АҚШ, Өзбекстан және Қазақстан құрамасының спортшылары қатысты.
Бұл жас санатында да Қазақстан 7 алтын, 6 күміс, 14 қола медальмен жалпы есепте көш басынан көрінді.
Екінші орынға Өзбекстан спортшылары орналасса (5 алтын, 7 күміс, 7 қола), үшінші сатыға Қырғызстан спортшылары (1 алтын, 5 қола) тұрақтады.
Жеңіс тұғырында әнұранымызды шырқатқан отандастарымыздың қатарында:
Жанарыс Рахметқали (-66кг), Әділет Алмат (-73 кг), Мұхаммедали Мавлидов (-90 кг), Ұлдана Үсейн (-57 кг), Самалай Ерғалиева (-63 кг), Ажар Асхат (-70 кг), Карина Такиева (+78 кг) бар.
Күміс медальға Телжан Сұлтанбай (-60 кг), Нұрсұлтан Қаблан (+100 кг), Нұржан Бисенов (-81 кг), Тасним Абдуали (-48 кг), Гүлнұр Баханова (-63 кг), Анастасия Морозова (-70кг) қол жеткізді.
Үшінші орынға Қанат Нұргелді (-60 кг), Аман Бақытжан (-60 кг), Нұрсұлтан Зайзағалиев (-66 кг), Нұрсұлтан Жұбатқан (-66 кг), Оразгелді Оралов (-73 кг), Азат Күмісбай (-81 кг), Құдірет Досымов (-90 кг), Ирина Дубовская (-48 кг), Нұрайлым Сәрсенбек (-48 кг), Аружан Ережепова (-52 кг), Алтынай Нұрханова (-57 кг), Қарлығаш Телман (-63 кг), Ақбота Қыдырәлі (-70 кг), Шынар Абатова (-78 кг) жайғасты.
Биыл алтыншы рет ұйымдастырылып отырған Азия кубогіне барлығы 680 спортшы қатысты.
Айта кетерлігі, Азия кубогі аясында төрешілерге арналған халықаралық семинар-емтихан өтті.
IJF мамандарының қатысуымен өткен семинар-емтихан нәтижесінде емтиханды сәтті тапсырған қазақстандық мамандар Самат Сапишев IJF International, Асхат Жіткеев пен Николай Иванов IJF Contenintal төреші атағына ие болды.
Бекет Сапабекұлы Махмұтов – 2009-2012 жылдар аралығында Қазақстан дзюдо федерациясының президенті, сондай-ақ, Азия дзюдо одағының вице-президенті қызметін атқарған.
Дзюдодан Бекет Махмұтов атындағы турнир 2017 жылдан бері Алматы қаласында дәстүрлі түрде өткізіліп келеді.
Жастар
Қыздар
-57 кг
1. Ұлдана Үсейн (Қазақстан)
2. Ерденецецег Цогбадрах (Моңғолия)
3. Жанар Жолдошева (Қырғызстан)
3. Алтынай Нұрханова (Қазақстан)
-63 кг
1. Самалай Ерғалиева (Қазақстан)
2. Гүлнұр Баханова (Қазақстан)
3. Қарлығаш Телман (Қазақстан)
3. Адина Кочконбаева (Қырғызстан)
-70 кг
1. Ажар Асхат (Қазақстан)
2. Анастасия Морозова (Қазақстан)
3. Сәуле Алмазова (Қырғызстан)
3. Ақбота Қыдырәлі (Қазақстан)
-78 кг
1. Шахида Нармұхамедова (Қырғызстан)
2. Ширинджон Юлдошова (Өзбекстан)
3. Шинар Ибраева (Өзбекстан)
3. Шынар Абатова (Қазақстан)
+78 кг
1. Карина Такиева (Қазақстан)
2. Дурдона Низомаддинова (Өзбекстан)
3. Ақмаржан Тұрдажиева (Қырғызстан)
3. Мохларойим Тухтамышева (Өзбекстан).
Ұлдар:
-73 кг
1. Әділет Алмат (Қазақстан)
2. Ходжиакбар Тошев (Өзбекстан)
3. Оразгелді Оралов (Қазақстан)
3. Нұрмұхаммед Бакирдинов (Қырғызстан)
-81 кг
1. Шахзодхуджа Шарипов (Өзбекстан)
2. Нұржан Бисенов (Қазақстан)
3. Мұхамаджон Абдуджалилов (Тәжікстан)
3. Азат Күмісбай (Қазақстан)
-90 кг
1. Мұхаммедали Мавлидов (Қазақстан)
2. Мұхаммедали Тангриев (Өзбекстан)
3. Мұхаммадсодик Содиков (Өзбекстан)
3. Құдірет Досымов (Қазақстан)
-100 кг
1. Рустам Шорахматов (Өзбекстан)
2. Нумонджон Раджабов (Өзбекстан)
3. Фирдавс Давлатов (Өзбекстан)
4. Түлкінбек Тұрдиев (Өзбекстан)
+100 кг
1. Иброхимджон Елмуродов (Тәжікстан)
2. Нұрсұлтан Қаблан (Қазақстан)
3. Абдуллох Худойоров (Өзбекстан)
3. Джавохир Муродуллаев (Өзбекстан).
Еске сала кетейік, бұдан бұрын Азия кубогінің алғашқы күнінде Қазақстан дзюдошыларының 5 алтын медаль жеңіп алғанын жазған болатынбыз.
Сондай-ақ Қазақстан жасөспірімдер құрамасы дзюдодан Азия кубогінде көш бастады.